Ողջո՛ւյն, հարգելի՛ ընթերցող։
Գիրքը, որն այս պահին պահում ես ձեռքերումդ, կարդում ես էլեկտրոնային կամ լսում ես աուդիո ձևաչափով, իմ հեղինակած առաջին վեպն է։
Լինելով ինքնազարգացման և փիլիսոփայական գրականության մեծ սիրահար՝ ես տարիներ շարունակ ուսումնասիրել եմ բազմաթիվ աշխատություններ։ Այդ երկար ճանապարհին նկատեցի մի կարևոր ճշմարտություն. այս բոլոր գրքերում արծարծվող հիմնարար սկզբունքները նույնն են։ Ստացածս գիտելիքն ու փորձառությունը վերլուծելուց հետո իմ մեջ մեծ ցանկություն առաջացավ դրանք փոխանցել մարդկանց և իրապես օգտակար լինել։
Սկզբում այս պատմությունը մտահղացել էր որպես կինոսցենար։ Ցանկանում էի էկրանավորման միջոցով պատկերավոր պատմել հիմնարար սկզբունքների մասին։ Սակայն ստեղծագործական ընթացքում հասկացա, որ պատմությունը պետք է ստանա վեպի տեսք՝ միավորելով առակը, ինքնազարգացման և փիլիսոփայության ժանրերը։ Ահա թե ինչպես ծնվեց «Դատարկ էջերի գաղտնիքը» վեպը։
Իմ նպատակն էր գրել մի գիրք, որը կդիպչի ձեր հոգուն, կաջակցի բարդ պահերին և թույլ կտա նորովի նայել իրականությանը։ Այս պատմությունը կօգնի ձեզ ստեղծագործաբար լուծել կյանքի խնդիրները՝ երբեմն դրանք վերածելով հնարավորությունների ու շահույթի։ Հերոսների արկածները ձեզ ստիպելու են խորհել անձնական ազատության և այն թաքնված ներուժի մասին, որը դեռ չեք օգտագործել։
Այստեղ հավաքված գաղափարները տարիների ընթացքում քաղել եմ իմ կարդացած գրքերից և իմ ուսուցիչներից։ Յուրաքանչյուր էջ ինձ համար դարձել է մի փորձառու վարպետ, որն օգնել է կատարելագործվել։ Իմ միակ ցանկությունն է, որ այս վեպն օգուտ տա մարդկանց։ Եթե դուք որևէ արժեքավոր բան քաղեք այստեղից, դա ինձ համար կլինի մեծագույն երջանկություն։
Անձնական փորձն անհնար է ամբողջությամբ պատճենել, բայց կյանքի հիմնարար սկզբունքները փոխանցել հնարավոր է։
Մենք հաճախ մերժում ենք ճշմարտությունները՝ մտածելով, թե «դրանք չափազանց պարզ են»։ Բայց իրականում ամեն ինչ իսկապես պարզ է. դժվարը այդ պարզ սկզբունքներին հետևելն է։ Երջանկության և հաջողության օրենքները հեշտ է հասկանալ, բայց կիրառելուն հաճախ խանգարում են վախերը, կասկածներն ու շրջապատի կարծիքը։ Սակայն նա, որ համբերատար ու հետևողականորեն քայլում է այդ ուղիով, անպայման հասնում է դրական փոփոխությունների։
Այս գրքի սկզբունքները հավերժական են։ Դրանք աշխատում են միշտ և ամենուր՝ անկախ երկրից, մշակույթից կամ իրավիճակից։ Եթե կարծում եք, որ ես չափազանց մեծ պատասխանատվություն եմ վերցնում ինձ վրա, թույլ տվեք բերել երկու փաստարկ.
1․ Այս սկզբունքները ես չեմ հորինել։ Դրանք գոյություն են ունեցել միշտ՝ ինչպես բնության օրենքները։ Դրանք կառավարում են մեր կյանքը՝ ուզենք թե չուզենք։ Նույնիսկ եթե ժխտում ենք դրանք, դրանից իրենց ուժը չեն կորցնում։
2․ Բոլոր հաջողակ մարդիկ ապրում են հենց այս օրենքներով։ Ուսումնասիրեք ցանկացած հաջողակ անհատի կամ կազմակերպության անցած ուղին, վերլուծեք նրանց քայլերը, և դուք ինքներդ կգտնեք դրա ապացույցները։
Անկասկած, կլինեն մարդիկ, ովքեր չեն ընդունի այս փիլիսոփայությունը, կմնան անտարբեր կամ նույնիսկ կքննադատեն այն։ Ես կողմ եմ առողջ քննադատությանը. դա լիովին նորմալ է և միայն ապացուցում է, որ մենք բոլորս տարբեր ենք ու զարգանում ենք յուրովի։
Հաճախ, լսելով ծանոթ մտքեր, մենք ասում ենք. «Դե, սա ես արդեն գիտեի»։ Սա ամենամեծ ծուղակն է։ Նման մտածողությունը փակում է մեր միտքը, քանի որ խնդիրը նոր բան իմանալը չէ, այլ արդեն իմացածը կյանքում կիրառելը։
Ես ցանկանում եմ, որ «Դատարկ էջերի գաղտնիքը» վեպը քեզ համար դառնա հաջողության, երջանկության յուրօրինակ ուղեցույց։ Երազի՛ր, ստեղծագործի՛ր և ճիշտ պլանավորիր նպատակներդ։
Շնորհակալ եմ քեզ, սիրելի՛ ընթերցող, քո ամենաթանկ ռեսուրսը՝ ժամանակը այս էջերին տրամադրելու համար։ Ես կփորձեմ լիովին փոխհատուցել այդ ներդրումը՝ փոխանցելով քեզ հետաքրքիր, խորը և անսպասելի էմոցիաներ։
Այժմ ժամանակն է սկսելու պատմությունը...
Սովորիր գնահատել ուրիշի աշխատանքը,
և աշխարհը կսովորի գնահատել քոնը։
Սիրով ձեր՝
Խաչ Առուշանյան
